Friday, June 5, 2015

பக்கத்து ஃப்ளாட் காலியாயிருந்தால்!!!



சமீபத்தில் ரிஷபன் சார் அவர்கள் முகப்புத்தகத்தில் பக்கத்து ஃப்ளாட் காலியாயிருந்தால் அங்கு என்னவெல்லாம் நடக்கிறது என்பதை பற்றி சுவைப்பட சொல்லியிருந்தார். அதை படித்ததிலிருந்து தில்லியில் நடந்த சம்பவம் ஒன்று நினைவுக்கு வந்தது. வாங்க! அது என்னவென்று தெரிந்து கொள்ளலாம்J

நான் திருமணமாகி தில்லி சென்ற சமயம் எங்கள் பக்கத்து ப்ளாட் காலியாகத் தான் இருந்தது. எல்லோரும் குப்பைகளை அங்கு தான் கொட்டிக் கொண்டும், பைகளில் கட்டி வீசிக் கொண்டு இருந்தார்கள். என்னவர் அலுவலகம் கிளம்பும் போது வாசலில் பை சொன்ன பின்னர் அவர் கீழே இறங்குவதற்குள் வாசல் கேட்டை மூடிவிட்டு பால்கனிக்கு ஓடி அங்கிருந்து அவர் தெருமுக்கு திரும்பும் வரை பை சொல்ல காலி ஃப்ளாட் பெரும் உதவியாக இருந்தது…:))) இதெல்லாம் டூ மச் இல்ல!!!….:)))

குளிர்காலத்தில் ஒருநாள் நான் மற்றும் எங்கள் ஃப்ளாட் தோழிகளான மகி மற்றும் கவிதாவுடன் எங்களுக்கு சொந்தமான மொட்டை மாடியில் அரட்டை அடித்துக் கொண்டிருந்தோம். தில்லியில் எப்பவுமே POLLUTION கூடுதல் என்பதால் மாடி முழுவதும் மண்ணாக இருந்தது. சரி பெருக்கி விட்டு பாய் போட்டு வெயிலில் உட்காரலாம் என்று ஆளுக்கொரு வேலையாக பெருக்கி சுத்தம் செய்தோம். சேகரித்த குப்பைகளை என்ன செய்யலாம்? கீழே எடுத்துப் போகலாமா என்று யோசிப்பதற்குள் கவிதாவும், மகியும் அப்படியே கீழே தூக்கிப் போடு என்று சொல்ல முறத்தோடு மண்ணை கொட்டினேன். அவ்வளவு தான்…

கீழேயிருந்து ஹிந்தியிலும், மலையாளத்திலுமாக செமையாக வசவுகள். மூவரும் அலறிக் கொண்டு எட்டிப் பார்த்தால் நான் கொட்டிய மண் முழுவதும் கீழே சென்று கொண்டிருந்த ஒரு ஆளின் தலையில் அபிஷேகமாக ஆகியுள்ளது. மூவரும் சிரிப்புத் தாளாமல் கீழே அமர்ந்து கொண்டு சத்தமில்லாமல் சிரித்துக் கொண்டிருந்தோம். ஒருபுறம் பயம் வேறு. அந்த ஆள் மேலே ஏறி வந்து சத்தம் போடுவாரோ??? இல்லை வேலைக்கு சென்றுள்ள இந்த மனுஷன் வேறு இந்த விஷயம் தெரிந்து என்ன சொல்வாரோ??? என்று ஆயிரம் கேள்விகள்….:))) நல்லவேளை எந்த கெடுதலும் நிகழவில்லை…:))) ஆனால் பல வருடம் என்னை இந்த விஷயத்தை வைத்து கிண்டல் செய்திருக்கிறார்….:)))

இந்த சுவையான சம்பவத்தை நினைவு கூர்வதற்கு உதவி புரிந்த ரிஷபன் சாருக்கு என் மனமார்ந்த நன்றிகள்.

மீண்டும் சந்திப்போம்,

ஆதி வெங்கட்

திருவரங்கம்.

Wednesday, April 29, 2015

புதிதாக ஒரு பழக்கம்!!!

பட உதவி - கூகிள்!

காலையில் காபியோ தேநீரோ குடிக்காவிட்டால் ஏதாவது ஆகிவிடுமா????? ஒன்றும் ஆகாது….:)) எங்கள் வீட்டிலேயே அப்பா, அம்மா, தம்பி என அனைவருமே காபி பிரியர்கள்…..:)) ஒருவேளை குடிக்காட்டா கூட என் அம்மா தலையில் துண்டை இறுக கட்டிக் கொண்டு தலைவலியில் துடித்து போயிடுவார்….:))) ஆனா இவர்களுக்கு மத்தியில் காபியே குடித்திராத ஜீவன் ஒன்று இருந்ததென்றால் அது வேறு யாராக இருக்கும்???? அடியேன் தான் என்று சொல்லவும் வேண்டுமா?? எப்படியோ தப்பி பிழைத்து விட்டேன்…..:)))

மாலையில் தேநீர் அருந்த மட்டும் பழகினேன். அதுவும் கல்லூரிப்பருவத்தில். திருமணத்திற்குப் பின் யார் வீட்டுக்கு சென்றாலும் அவர்கள் கிச்சனுக்கு செல்லும் முன்பே எனக்கு முன்னே என்னவர் சொல்லிவிடுவார். இவள் காபியே குடித்திராதவள் என்று….:)) பிடிக்காத சிலதும் கர்ப்பகாலத்தில் பிடிக்கும்….:))) அதனால் அப்போ குடிக்க ஆரம்பிப்பே என்றும் சிலர் பயமுறுத்தினர்….:))) ஆனால் ம்ஹூம்ம்ம்….:))

சரி! இப்போ இந்தப் புராணம் எதற்கு???? இப்போ புதிதாக ஒரு பழக்கத்தை கடைபிடித்து வருகிறேன். அதை இனி என் வாழ்வில் தொடரவும் வேண்டும் என்பது என் விருப்பம்….:)) என்ன அது????

சென்ற வருடம் உடல்நலமின்மைக்காக மருத்துவரை சந்திக்க நேர்ந்தது. எல்லா டெஸ்டும் செய்து விட்டு உயரத்திற்கு ஏற்ற எடை இருந்தாலும் வயிறு குறைவதற்காக டயட் சார்ட் போட்டுக் கொடுத்தார். பிரசவத்திற்கு பிறகு கூட வயிறு கூடவில்லை…:)) தில்லி திரும்பிய பின் என் தோழிகள் கூட ஆச்சரியப்பட்டனர். தலைமுடியும் நன்கு வளர்ந்திருந்தது.. வயிறும் கூடவில்லை. குண்டாகவும் இல்லை….:)) ஆனால் HARMONAL IMBALANCEஆல் அவதிப்பட ஆரம்பித்ததும் எல்லாம் தலைகீழாக மாறிவிட்டது…..:(( இப்போதும் அதே தான்…L

அந்த டயட் சார்ட்டில் இருந்ததை ஏறக்குறைய ஒரு வருடமாக முடிந்தளவு பின்பற்றுகிறேன். அதில் ஒன்று தான் இந்த பழக்கம். காலையில் வெறும் வயிற்றில் வெதுவெதுப்பான நீரில் ஒரு தேக்கரண்டி தேனும், அரைமூடி எலுமிச்சை சாறும் கலந்து பருகத் துவங்கினேன். இதை குடித்த பின் அப்படி ஒரு புத்துணர்ச்சி. முன்பு பாலோ, தேநீரோ குடிக்கும் போது கூட அதன் சுவை நாக்கில் சுழட்டிக் கொண்டேயிருக்கும்.. ஆனால் இப்போ அதெல்லாம் இல்லை….:))

இந்த பழக்கத்தை தொடர்ந்து கடைபிடிக்க வேண்டும்…J

மீண்டும் சந்திப்போம்,

ஆதி வெங்கட்
திருவரங்கம்.


Friday, April 10, 2015

ஷாஹி பனீர்!





வட இந்திய உணவகங்களில் ”ஷாஹி பனீர்” என்றும் நம் தமிழகத்தில் ”பனீர் பட்டர் மசாலா” என்றும் அழைக்கப்படும் இந்த சப்ஜியை எப்படி செய்வது, என்று இன்று தெரிந்து கொள்ளலாம்.

தில்லியில் இருந்தவரை அருகிலுள்ள கோவிந்த் தாபாவில் பலமுறை ருசித்தும், நானே பலமுறை செய்தும் சாப்பிட்டிருக்கிறோம். இங்கே வந்ததிலிருந்து இந்த பனீர் கிடைப்பது அரிதாகி விட்டது. தில்லியில் பால் வாங்கும் கடைகளிலும், மதர் டைரி பால்பூத்களிலும் கிடைக்கும் பனீர், இங்கே ஐஸ்க்ரீம் பார்லரில் சொல்லிவைத்தால் எப்போதாவது கிடைப்பது உண்டு. 

தில்லியில் வாரத்தில் ஒருநாளாவது காலை உணவுக்கு ப்ரெட் சாப்பிட்டு பழகிய நாங்கள் இங்கு வந்த பின் திண்டாடித் தான் போகிறோம். என் மகள் கடைக்கு சென்றாலே ப்ரெட்டைத் தவிர வேற என்ன வேண்டும் என கேட்கத் துவங்கவே, ”அம்மா என்னை கடைக்கு அனுப்பாதே” என சொல்லத் துவங்கிவிட்டாள்….:)))

சரி! வாங்க! ஷாஹி பனீர் எப்படி செய்யறதுன்னு பார்க்கலாம்…

தேவையானப் பொருட்கள்:-

பனீர் – 100 கிராம்
மிளகாய்த்தூள் – ½ தேக்கரண்டி
தனியாத்தூள் – 1 தேக்கரண்டி
கரம் மசாலா – ½ தேக்கரண்டி
மஞ்சள்தூள்- ¼ தேக்கரண்டி
உப்பு – தேவைக்கேற்ப
எண்ணெய் – தேவையான அளவு
சீரகம் – ½ தேக்கரண்டி

அரைக்க:-

வெங்காயம் – 2
தக்காளி – 2
இஞ்சி – 1 துண்டு
பச்சை மிளகாய் – 1
தனியா – 1 தேக்கரண்டி

செய்முறை:-

மிக்சியில் அரைக்க கொடுத்துள்ள பொருட்களை போட்டு நன்கு விழுதாக அரைத்துக் கொள்ளவும். வாணலியில் எண்ணெய் விட்டு சூடானதும் சீரகம் தாளிக்கவும். அடுத்து அரைத்த விழுதை சேர்த்த பின் கொதிக்க ஆரம்பித்ததும் உப்பு, மஞ்சள்தூள், மிளகாய்த்தூள், தனியாத்தூள், கரம் மசாலா என அனைத்தும் சேர்த்து நன்கு வதக்கவும். எண்ணெய் பிரியத் துவங்கியதும் க்ரேவிக்கு தேவையான தண்ணீர் சேர்த்து கொதிக்கும் போது, பனீரை தண்ணீரில் அலசி விட்டு துண்டங்களாக நறுக்கி க்ரேவியில் சேர்த்து இரண்டு நிமிடத்தில் இறக்கவும். பொடியாக நறுக்கிய கொத்தமல்லியால் அலங்கரிக்கவும்.

சுவையான ”ஷாஹி பனீர்” சப்பாத்தி, பூரி, நாண் மற்றும் புலாவ் இவற்றுடன் சாப்பிட ஏற்றதாகும்.


டிஸ்கி:-
1)        பனீர் சேர்ப்பதற்கு முன்னால் இருக்கும் க்ரேவியில் காய்கறிகளையோ, பயறுகளையோ சேர்த்து ஏகப்பட்ட சப்ஜிக்களை செய்யலாம்.
2)  சப்ஜியை இறக்குவதற்கு முன்னால் ப்ரெஷ் க்ரீம் சேர்க்கலாம். வெண்ணெயும் சேர்க்கலாம்.
3) க்ரேவியில் சில முந்திரிகளை அரைத்தும் சேர்க்கலாம்.
4) கசூரி மேத்தி எனப்படும் காய்ந்த வெந்தயக்கீரையும் சேர்க்கலாம்.
5)        க்ரேவியில் தயிர் சிறிதும் சேர்க்கலாம்.
6) எக்காரணத்தை கொண்டும் பனீரை எண்ணெயில் பொரிக்கக் கூடாது. தாபாக்களில் பலமுறை பார்த்ததால் சொல்கிறேன். பனீரை கடைசியாக க்ரேவியில் சேர்த்த பின் ஒரு கொதி மட்டுமே விட வேண்டும்.

இப்படி விருப்பத்திற்கேற்ப எதை வேண்டுமானாலும் சேர்த்துச் செய்யலாம். என்ன! உங்கள் வீட்டிலும் செய்து பார்ப்பீர்கள் தானே….:))

மீண்டும் சந்திப்போம்,

ஆதி வெங்கட்

திருவரங்கம்.

Thursday, April 9, 2015

சுக்டி சாப்பிடலையோ சுக்டி!!!






குஜராத் பயணத்தில் தான் சாப்பிட்ட ”சுக்டி” என்ற இனிப்பை பற்றி என் கணவர் பகிர்ந்து கொண்டதிலிருந்தே செய்து பார்க்க வேண்டும் என்ற ஆவல் இருந்து கொண்டேயிருந்தது. மகளின் பிறந்தநாளுக்கு இம்முறை இதை செய்து ,இருவரும் ருசித்தோம். சுவையோ அபாரம். செய்ய மிகவும் எளிமையாகவும் இருந்தது.

இந்த இனிப்பு ராஜஸ்தான், குஜராத் என இரு மாநிலங்களிலும் பிரபலமானது. நான் இந்த இனிப்பை செய்ய நினைத்த அன்று மிகவும் பரபரப்பான சூழ்நிலை. அலைச்சல், தொடர்ந்த அலைபேசி அழைப்புகள் என்று இருந்த போதிலும் என்னால் செய்ய முடிந்தது என்பதனால் எளிமையானது என்று சொல்கிறேன். தவிர்க்க முடியாத அலைபேசி அழைப்பிலும் பேசிக் கொண்டே செய்த இனிப்பு இதோ… பாகு வைக்க வேண்டிய அவசியமே இல்லை…J

தேவையானப் பொருட்கள்:-

கோதுமை மாவு – 1 கப்
நெய் – அரை கப்
வெல்லம் – கால் கப்
ஏலக்காய்த்தூள் – ½ தேக்கரண்டி
முந்திரி, பாதாம், பிஸ்தா – அலங்கரிக்க

செய்முறை:-

அடுப்பில் வாணலியை வைத்து கொடுத்துள்ள அரை கப் நெய்யையும் விட்டு நன்கு சூடுபடுத்தவும். அதில் கோதுமை மாவை போட்டு நன்கு சிவக்க வறுக்கவும். சிவந்ததும் அதில் கொடுத்துள்ள கால் கப் வெல்லத்தை சேர்த்து அடுப்பை நிறுத்தி விட்டு வெல்லம் உருகும் வரை கலக்கவும், இதில் ஏலக்காய் பொடி சேர்த்து இந்த கலவையை நெய் தடவிய தட்டில் கொட்டி மேலே பொடியாக நறுக்கிய முந்திரி, பாதாம், பிஸ்தா போன்றவற்றை தூவி சற்று கரண்டியால் அழுத்தி விட்டு ஐந்தே நிமிடத்தில் வில்லைகள் போட்டு விடலாம்…



சுடச் சுட சுக்டி தயார்.

என்ன உங்கள் வீட்டிலும் செய்து பார்ப்பீர்கள் தானே!

மீண்டும் சந்திப்போம்,

ஆதி வெங்கட்
திருவரங்கம்.

டிஸ்கி:-

செய்து பார்த்த குறிப்புகளின் படங்கள் ஏராளமாக காத்து கொண்டிருப்பதனால் தொடர்ந்து இன்னும் சமையல் குறிப்புகள் வரலாம்….:))


Wednesday, April 8, 2015

மாங்காய் தொக்கு!





மாங்காய் சீசனில் இந்த தொக்கு செய்து வைத்துக் கொண்டால் தயிர்சாதத்துக்கும், சப்பாத்தி, பராட்டா போன்றவற்றுக்கும் தொட்டுக்கையாக பயன்படுத்த ஏற்றதாகும். கிளிமூக்கு, குண்டு மாங்காய் என்று எதில் செய்தாலும் சுவையாக இருக்கும். நான் கிளிமூக்கு மாங்காயில் செய்திருக்கிறேன்.

தேவையானப் பொருட்கள்:-

மாங்காய் (பெரியது) – 1
மிளகாய்த்தூள் – 2 தேக்கரண்டி
பெருங்காயத்தூள் – ¼ தேக்கரண்டி
உப்பு – தேவைக்கேற்ப
மஞ்சள்தூள் – சிறிதளவு
நல்லெண்ணெய் – ஒரு குழிக்கரண்டி
கடுகு – ½ தேக்கரண்டி
வெந்தயம் – 1 தேக்கரண்டி

செய்முறை:-

மாங்காயை கழுவி தோல் சீவி விட்டு கேரட் துருவுவது போல் துருவிக் கொள்ளவும். வாணலியில் வெந்தயத்தை போட்டு நன்கு சிவக்க பொரிய விடவும். அதை ஆறிய பின் மிக்சியில் அரைத்து பொடியாக வைத்துக் கொள்ளவும். இப்போது வாணலியில் நல்லெண்ணெய் விட்டு சூடானதும் கடுகு சேர்த்து வெடிக்க விடவும். அடுத்து பெருங்காயத்தூள் சேர்த்து பொரிந்ததும், துருவிய மாங்காயை சேர்த்து வதக்கவும். இதனுடன் தேவைக்கேற்ப உப்பு, மிளகாய்த்தூள், மஞ்சள்தூள் சேர்த்து எண்ணெய் பிரியும் வரை வதக்கவும். கடைசியாக பொடி செய்த வெந்தயத்தை சேர்த்த பின் இறக்கவும்.

சுவையான, எளிதான மாங்காய் தொக்கு சுவைக்கத் தயார்…


நீங்களும் செய்து பார்த்து ருசியுங்கள்….:)

மீண்டும் சந்திப்போம்,

ஆதி வெங்கட்

திருவரங்கம்.

Monday, April 6, 2015

சிறுதானியப் பாயசம்!



சிறுதானியங்கள் உடலுக்கு நன்மை விளைவிக்கக்கூடியது. நார்ச்சத்து நிறைந்தவை. அரிசிக்கு பதிலாக சிறுதானியங்களை பயன்படுத்தினால் ஆரோக்கியம் மேம்படும். இவ்வளவு சிறப்புகள் வாய்ந்த சிறுதானியத்தில் செய்த பாயசம் இதோ… சென்ற மாதம் வந்த மகளின் நட்சத்திர பிறந்தநாளன்று செய்தது இது….:)

தேவையான பொருட்கள்:-

சிறுதானியம்சின்ன கிண்ணம்
சர்க்கரை – 8 தேக்கரண்டி
பால் – ½ லிட்டர்
ஏலக்காய் – சிறிதளவு
முந்திரி, திராட்சை – சிறிதளவு
நெய் – சிறிதளவு
எசென்ஸ் – தேவைப்பட்டால் ஒரு சில சொட்டுகள்
கண்டென்ஸ்டு மில்க் – விருப்பத்திற்கிணங்க சிறிதளவு

செய்முறை:-

வாணலியில் சிறுதானியத்தை போட்டு சற்று வறுத்துக் கொள்ளவும். பின் அதை தண்ணீரில் அலசி விட்டு, காய்ச்சிய பால் சேர்த்து வேகவிடவும். விரைவில் வெந்து விடும் என்பதால் நான் பாயசம் செய்த பாத்திரத்திலேயே வேகவிட்டேன். பின் அதனுடன் ஏலக்காய், சர்க்கரை சேர்க்கவும். கன்டென்ஸ்டு மில்க் சிறிதளவு வேண்டுமானால் சேர்த்துக் கொள்ளலாம். நெய்யில் முந்திரி, திராட்சையை வறுத்து பாயசத்தில் சேர்க்கவும். சற்று ஆறியதும் எசென்ஸ் ஓரிரு சொட்டுகள் சேர்த்துக் கொள்ளலாம்.

சுவையான சத்தான சிறுதானியப் பாயசம் தயார். வெள்ளை சர்க்கரையும் உடலுக்கு நல்லதல்ல என்பதால் அதற்கு பதிலாக வெல்லம் சேர்த்து செய்வது நல்லது.


என்ன! உங்கள் வீட்டிலும் செய்து பார்ப்பீர்கள் தானே!

சிறுதானிய உணவு - சிறுதானியப் பொங்கல்

மீண்டும் சந்திப்போம்,

ஆதி வெங்கட்

திருவரங்கம்.

Saturday, April 4, 2015

தேவதைக்கு பிறந்தநாள்!

எங்கள் வாழ்வுக்கு ஒரு அர்த்தத்தையும், உத்வேகத்தையும் தந்து கொண்டிருக்கும் எங்கள் தேவதைக்கு இன்று பிறந்தநாள். பத்து வயது முடிந்து பதினோராம் வயதில் அடியெடுத்து வைக்கும் இவளுக்கு எல்லா வளமும் நலமும் கிடைத்து அன்போடும், ஆரோக்கியத்தோடும், அறிவுடனும் வைத்திருக்க எல்லாம் வல்ல இறைவன் அருள்புரியட்டும்...

பிறந்தநாள் வாழ்த்துகள் கண்ணா!

அம்மாவும், அப்பாவும்.....











பிறந்தநாள் கொண்டாட்டத்தில் வாழ்த்து சொல்லப் போகும் அனைவருக்கும் நான் செய்த ராஜஸ்தானிய மற்றும் குஜராத்திய இனிப்பான ”சுக்டி” இதோ.....:)


ஸ்வீட் எடு கொண்டாடு!


ஆதி வெங்கட்
திருவரங்கம்.


Friday, March 27, 2015

தென்னங்காற்று! – வித்யா சுப்ரமணியம்





சமீபத்தில் நூலத்திலிருந்து எடுத்து வந்து வாசித்த நூல் தான் வித்யா சுப்ரமணியம் அவர்களின் தென்னங்காற்று. குடும்பக் கதையாகவும், அதில் இயற்கையை போற்றியும், ஆங்காங்கே பாரதியாரின் பாடல்களும் என வாசிக்க மிகவும் சுவாரசியமாக இருந்தது.


கிருஷ்ணமூர்த்தி என்ற இளைஞனின் வாழ்க்கையில் ஏற்பட்ட சம்பவங்களே கதையாக இங்கு சித்தரிக்கப்பட்டுள்ளது. படித்து விட்டு தக்க வேலைக்காக காத்திருக்கும் அவனுக்கு, வாஞ்சையாக பரிந்து பேசும் அம்மா, உடன்பிறந்தோர், கண்டிப்பான அப்பா, உற்ற நண்பனான சிகாமணி என உற்றார் உறவினர். அக்காப் பெண்ணை திருமணம் செய்து வைத்து அவர்களின் கடையை சீதனமாக தர முன் வர, பிடிக்காத பெண்ணை கட்டிக் கொள்ள மனமில்லாமல் வீட்டை விட்டு வெளியேறுகிறான்.

மனம் போன போக்கில் ஒரு கிராமத்தில் இறங்கிய அவனுக்கு அங்குள்ள ஸ்டேஷன் மாஸ்டர் உதவுகிறார். அவரின் மகள் பாலாம்பிகா தான் கதையின் நாயகி. கொள்ளை அழகுக்கு சொந்தமான அவளுக்கு ஆயிரம் பிரச்சனைகள். கிருஷ்ணமூர்த்தி அங்குள்ள தென்னந்தோப்பை விலைக்கு வாங்குகிறான். கடை ஒன்றிலும் வேலை செய்கிறான். கிருஷ்ணமூர்த்திக்கும், பாலாம்பிகாவுக்கும் இடையில் காதல் மலர்கிறது. அந்த கிராமத்தில் முதியோர் கல்வியை துவக்கி பத்திரிக்கை உலகே பேட்டிக் காண தேடி வரும் அளவில் உயர்கிறான். இவனுடன் இந்து என்ற பெண்ணும் உற்ற துணையாக இருக்கிறாள்.

மகனின் புகழ் பத்திரிக்கை வரையில் வந்ததைக் கண்டு அப்பாவே தேடி வருகிறார். இனி என் வாழ்க்கை உன்னுடன் தான் என்று மகனை ஆரத்தழுவுகிறார். இந்து கிருஷ்ணமூர்த்தியை விரும்ப அவன் யாரை திருமணம் செய்து கொண்டான் என்பது தான் கதை…

ஆங்காங்கே சூழ்நிலைக்கு தகுந்தாற்போன்று பாரதியாரின் பாடல்களும், கிராமத்து சூழலை கண் முன்னே காண்பித்து இருக்கும் வரிகளும், அம்மாவுக்கும் பிள்ளைக்கும் இடையே இருக்கும் பாச பிணைப்பும், ”திருமணம் முடிந்து இந்த வேப்ப மரத்திடம் வந்து நமஸ்கரிக்க வேண்டும். என் மனைவியை இதற்கும் காண்பிக்க வேண்டும்” என்பது போன்ற ஆத்மார்த்தமான வரிகளும் புத்தகம் முழுவதும் நிரம்பியுள்ளன. பாராட்டுகள் மேடம்.

என்னைக் கவர்ந்த நூல், உங்களுக்கும் பிடிக்குமாயின் வாய்ப்பு கிடைக்கும் போது நீங்களும் வாசித்து மகிழுங்களேன்.

சென்ற மாதம் இவரை சந்தித்த அனுபவத்தை இங்கே எழுதியிருக்கிறேன்..

மீண்டும் சந்திப்போம்,

ஆதி வெங்கட்

திருவரங்கம்.

டங்கள் உதவி - கூகிள்.

Sunday, March 22, 2015

தீ ரண சஞ்சீவிக்கு நன்றி!



இரண்டு வாரங்களுக்குப் பிறகு கைகள் ஏறக்குறைய குணமாகிவிட்டது. பின்னூட்டத்திலும், மின்னஞ்சலிலும் விசாரித்த நட்புகளுக்கு என் நெஞ்சார்ந்த நன்றிகளை தெரிவித்துக் கொள்கிறேன். புதுத்தோல் வரத் துவங்கியுள்ளது. சென்ற பகுதியில் சொன்னது போன்று நான் பயன்படுத்திய தீ ரண எண்ணெய் பற்றிய சில தகவல்கள்….

திருச்சியில் உள்ள பெரும்பாலானவர்களுக்கு இந்த எண்ணெய் பற்றி தெரிந்திருக்கிறது. அக்கம் பக்கம் முதல் வெளியில் செல்லும் போது என்று எங்கு சென்றாலும் கைகளை பார்த்தவர்கள் அனைவரும் என்னிடம் இந்த எண்ணெய் உள்ளது தருகிறேன். தவறாமல் தடவிக் கொள் சரியாகிவிடும்என்று அத்தனை பேரும் பரிந்துரைத்தார்கள்.

எனக்கு வேதனையாக இருந்த போது தான் மகளுக்கும் நல்ல ஜுரமாக இருந்தது. அவளை மருத்துவரிடம் அழைத்துச் சென்று blood test எல்லாம் எடுத்து ஊசி போட்டு பின் குணமானது. அப்போது அந்த மருத்துவரிடமே கைகளை காண்பித்து கொப்புளங்கள் உடைகின்றன. மீண்டும் தண்ணீர் கோர்த்துக் கொள்கிறது, நடுவிரல் கொழகொழப்பாகவே இருப்பதாகவும் சொல்ல, மேல்தோலை கத்தரித்து எடுத்து விட்டு இந்த எண்ணெயைத் தான் தடவச் சொன்னார்…..:)

மருந்து கடைகளிலும் இதைத் தான் பரிந்துரைத்தனர். ஆக மொத்தம் இவ்வளவு பேரும் பரிந்துரைத்த, எனக்கும் நிவாரணம் கிடைத்த எண்ணெய் இதோ….


தீப்புண், சைலன்சர், குக்கர் ஆவி, கொதிக்கும் எண்ணெய், நாள்பட்ட காயங்கள் என அனைத்திற்குமே நிவாரணம் தரும் இந்த எண்ணெய். 70 சதவீத தீக்காயங்களைக் கூட குணமாக்கியுள்ளது.

தில்லியில் உள்ள தோழி ஒருவர் இங்கே ஒரு எண்ணெய் வேண்டும் என்று கேட்டிருந்தார். பல வருடங்களுக்கு முன்னர் வாங்கி சென்றிருக்கிறாராம். கிடைத்தால் வாங்கித் தருகிறோம் என்று சொன்னோம். அந்த எண்ணெயின் பெயர் ”வசந்த மாலதி”….:) தெரிந்த கடையில் கேட்கவே சற்று தயங்கினேன். ஒருவர் கேட்டிருந்தார் என்று தான் முதலிலேயே ஆரம்பித்து சொன்னேன். ஆமாங்க! அந்த எண்ணெய்க்கு காலாவதி தேதியே கிடையாது. அற்புதமான எண்ணெய், கிடைப்பது சற்று சிரமம் என்றார். அப்பாடா! உடனே நான் “அவசரம் இல்லை, கிடைக்கும் போது வாங்கித் தாங்க. தில்லியிலிருந்து ஒருவர் கேட்டிருந்தார் என்று சொல்லி புக் செய்து விட்டு வந்தேன்…..:)

ஆக, சித்த ஆயுர்வேத மருந்துகளுக்கு நல்ல சக்தி இருக்கிறது….

மீண்டும் சந்திப்போம்,

ஆதி வெங்கட்
திருவரங்கம்.


பின்குறிப்பு:- முகப்புத்தக பூதத்திடம் அகப்பட்டுக் கொண்டால் மீளவே முடிவதில்லை….:))

Tuesday, March 10, 2015

தண்ணில கண்டம்!!!!





சமீபத்தில் வெளியான ”தண்ணில கண்டம்” படம் பற்றி ஏதோ எழுதப் போறேன்னு யாரும் நினைத்தால் அதற்கு நான் பொறுப்பல்ல…. ஏறக்குறைய பத்து நாட்களுக்கு முன்னர் தண்ணீரால் என் கைக்கு ஒரு கண்டம் ஏற்பட்டதைத் தான் உங்களிடம் சொல்லப் போகிறேன். ஞாயிறான அன்று காலைச் சிற்றுண்டியை முடித்துக் கொண்டு மாசிமாத தெப்போற்சவத்தில் வீதியுலாவின் ஒரு நாளாக எங்கள் குடியிருப்புக்கு பெருமாள் வரவிருப்பதால் அதற்கு தயாராகி கும்பலில் முட்டி மோதி நம்பெருமாளை தரிசித்து விட்டு நானும் மகளும் வீட்டுக்கு வந்தோம்.

மதிய சமையலுக்காக குக்கரில் சாதமும் பருப்பும் வைத்து விட்டு, எப்போதும் எங்கள் வீட்டில் கொதிக்க வைத்து ஆற வைத்து வடிகட்டிய நீர் தான் குடிக்க பயன்படுத்துவேன் என்பதால், ஒரு அடுக்கில் வெந்நீர் போட இண்டக்‌ஷன் அடுப்பில் வைத்தேன். ஏதோ வோல்டேஜ் தகராறு போல அது வேலை செய்யவில்லை…. சரியென்று கேஸ் டவ்வில் ஒரு புறம் குக்கரும் இன்னொருபுறம் வெந்நீரும் போட, சிறிது நேரத்தில் கொதித்ததும் நிறுத்தி விட்டு இறக்கி அந்த அடுப்பில் ரசம் வைக்கலாமென  இறக்கினேன். இரு கைகளாலும் அடுக்கை பிடித்து இறக்கும் போது குக்கரின் பிடி இடித்து தண்ணீர் கைகளில் தெளித்து கொட்ட……

அந்த நேரத்திலும் அடுக்கை பத்திரமாக மேடையில் இறக்கி தட்டை போட்டு மூடி விட்டு வேக வேகமாக பாத்ரூமில் பக்கெட்டில் பிடித்து வைத்திருந்த தண்ணீரில் இரு கைகளையும் வைத்து விட்டு அமர்ந்தேன். (திருச்சியில் இப்போதே அடிக்கும் வெய்யிலில் குழாய்களில் கொதிக்க கொதிக்க வெந்நீர் தான் வருகிறது) ஐந்து நிமிடம் ஆகியிருக்காது அந்த நீரும் எனக்கு எரிச்சலைத் தர ஃப்ரிட்ஜை திறந்து ப்ரீசரில் கைகளை வைத்துக் கொண்டேன். அப்போது தான் என் மகளுக்கே காயம் ஏற்பட்ட விஷயம் தெரியவந்தது. அவளை விட்டு ஃப்ரிட்ஜில் வைத்திருந்த இட்லி மாவை எடுத்து கைகளில் தடவ சொல்லி கத்திக் கொண்டிருந்தேன். அவளும் மாவை பதட்டத்துடன் கைகளில் தடவி விட்டாள். எல்லாம் ஐந்து நிமிடம் தான். மீண்டும் எரிச்சல்…. அவள் நான் துடிப்பதை பார்த்து பயந்து போய் அவள் அப்பாவுக்கு போன் செய்து விட்டாள்….:)

என்னையும் பேசச் சொல்கிறாள். நான் பேசக்கூடிய நிலையிலேயே அப்போது இல்லையே, முடியாது என்று சொல்ல…. அவளே பக்கத்து வீட்டில் இருந்த தோழியை அழைத்து அவரிடம் பேசச் சொல்லி என்னவரின் அறிவுரையின் பேரில் தேங்காயெண்ணையும் மஞ்சளும் குழைத்து கைகளில் தடவிவிட்டார்கள். ஃபேன் காற்றில் கைகளை காண்பித்து ஊதிக் கொண்டேயிருக்க, எரிச்சலும், வலியும் ஒன்று சேர ஒருமாதிரி மயக்கம் ஏற்பட, சற்று ஓய்வு எடுக்க வேண்டும் போல இருந்தது. ஆனால் முடியவில்லை.

மாலையில் எரிச்சல் கொஞ்சம் குறைய, வேலை செய்ய ஆரம்பித்ததும் கொப்புளங்கள் ஏராளமாக வரத் துவங்கவே.. அப்போது தான் தெரிந்தது. இடது கையில் நான்கு விரல்களிலும், வலது கையில் இரண்டு விரல்கள் என ஆறு விரல்களை இந்த வெந்நீர் குளிப்பாட்டியிருக்கிறது என….

தீ ரண சஞ்சீவி

மாலையில் பால்காரர் மூலம் தான் இந்த எண்ணையின் மகிமையைத் தெரிந்து கொண்டேன். 70 சதவீத தீக்காயத்தைக் கூட சரிசெய்யக்கூடியதாம்.  அவரது மகன் ப்ளாஸ்க்கில் வைத்திருந்த டீயை (மூடி சரியாக மூடாமல் இருந்ததை கவனிக்காமல் விளையாட்டாக) தோள்களில் சாய்த்து கொள்ள, கொட்டி வெந்து விட்டதாகவும் இந்த எண்ணெயின் மூலம் விரைவில் நிவாரணம் கிடைத்ததாகவும் சொல்லவே 100 மி.லி எண்ணெய் ரூ 150 எனச் சொல்லி அவரே வாங்கி வந்து தந்தார்.

ATS இன்ஜக்‌ஷன் போடலாம் என நினைத்தால் அன்று ஞாயிறு என்பதால் அருகில் மருத்துவர்கள் இல்லை. இந்த எண்ணையே போதும் என்று சொன்னார். அன்று முதல் கொப்புளங்கள் மேலேயே வேலைகளை முடித்துக் கொண்டு மீதி நேரங்களில் இந்த எண்ணையினை பயன்படுத்துகிறேன். வேலைகள் செய்யும் போது கொப்புளங்களில் ஓட்டை ஏற்பட்டு உடைந்து தண்ணீர் வருவதும், மீண்டும் தண்ணீர் ஊறிக் கொள்வதும் என வேதனை தான். இடது  கையின் நடுவிரலில் தான் மிகவும் மோசமாக இருந்தது. இப்போது அந்த விரல் தவிர மற்றவை பரவாயில்லை.

குக்கரில் கையை சுட்டுக் கொள்வதும், தோசைக்கல்லை காலில் போட்டுக் கொள்வதும் என இருந்த எனக்கு, எனக்கு விவரம் தெரிந்த நாளில் இருந்து இதுவே எனக்கு ஏற்பட்ட பெரிய தீக்காயமாகும்…:)

திருச்சியில் எல்லோரும் பரிந்துரைத்த, எல்லோர் வீட்டிலும் கட்டாயம் வாங்கி வைத்துக் கொள்ள வேண்டிய அருமையான இந்த தீ ரண எண்ணெயை பற்றி அடுத்த பகுதியில் சொல்கிறேன். சென்னையிலும் இது கிடைக்கிறது. விவரங்கள் அடுத்த பகுதியில்…. இப்போ கை வலிக்கிறது. எண்ணெய் தடவிக் கொள்ள வேண்டும்… பை….:))

மீண்டும் சந்திப்போம்,

ஆதி வெங்கட்

திருவரங்கம்.

Saturday, February 28, 2015

எதிர்பாராத சந்திப்பும்! சில நினைவுகளும்!



நேற்று முன் தினம் திருச்சிஉத்தமர் கோவில்வழியே செல்ல நேர்ந்தது. இது மும்மூர்த்திகளின் ஸ்தலம். அப்பாவோடு வந்து நான் தரிசித்த கோவில். என்னுடைய வசதிக்காக, தில்லியிலிருந்து விடுமுறையில் வரும் போது புகுந்த வீட்டுக்கும், பிறந்த வீட்டுக்கும் செல்லத் தோதாய் தன்னுடைய ஓய்வு பெற்ற பணத்தில் இந்த இடத்தில் அழகான வீட்டை கட்டினார். அப்போது ஒரு இருபது நாட்கள் அப்பாவுக்கு சமைத்துப் போட்டுக் கொண்டு இங்கிருந்தேன்.

அந்த பசுமையான நாட்கள் மனதுள் கரைபுரண்டோடின.. வாசலில் உள்ள எனக்கு பிடித்த படிக்கட்டுகளும், திண்ணையும், வீட்டைச் சுற்றி வேப்பமரங்களும், அதிலிருந்து வீசுகின்ற இதமான காற்றும், எதிர்த்தாற் போன்று பெருமாள் கோவிலும், அதிகாலையில் சந்தையிலிருந்து கொண்டு வரும் பச்சைபசேலென காய்கறிகளும், மாலையில் காற்றாட நடந்து உத்தமர் கோவிலுக்கு சென்ற நினைவும், அங்கே வார சந்தையில் விற்ற சாமான்களும் என நினைவுகள் எல்லை கடந்து சென்றன….

அப்பாவோடு கடைசியாக வசித்த நாட்கள். என்னை தனியே குழந்தையுடன் அனுப்ப மனதில்லாமல் தானே உடன் தில்லிக்கு வந்து விட்டு விட்டு, ஒரு வாரம் சென்ற பின் புறப்பட்டு சென்றவர். தில்லியிலிருந்து கிளம்பும் முன்உன்னிடம் மனசு விட்டு பேசணும். ஒரு விஷயத்தை சொல்லணும்என்று சொல்லி சொல்லாமலேயே சென்று விட்டார். ஏறக்குறைய ஏழு வருடங்களுக்கு பிறகு இந்த இடத்திற்கு சென்றிருக்கிறேன்.

சரி! இந்த இடத்திற்கு திடீரென செல்ல வேண்டியதன் அவசியம் என்ன???

பூவோடு சேர்ந்த நாரும் மணக்கும்என்று சொல்வார்கள் அல்லவா! அது என் வகையில் நிஜமே! ஒரு எழுத்தாளரை சந்தித்து பேசும் வாய்ப்பு எனக்கு கிடைத்தது. அவருடன் ஒரு புகைப்படமும் எடுத்துக் கொண்டேன். அருமையான பெண்மணி. முற்போக்கு சிந்தனையாளர், ஓவியர், மிகவும் எளிமையானவர், நல்ல மனது படைத்தவர். இதை விட வேறு என்ன வேண்டும் இவரை சந்திக்க…… ஏராளமான கதைகளை படைத்தவர், தேசிய விருதும் பெற்றவர். அவர் எழுத்தாளர் வித்யா சுப்ரமணியன்அவர்கள். சென்னையில் வசிக்கும் இவர் ஒரு விசேஷத்துக்காக திருச்சி வந்திருந்தார்.

இந்த வாய்ப்பு ரிஷபன் சார் மூலமாக எனக்கு கிடைத்தது. இதைத் தான் பூவோடு சேர்ந்த நார் என்று சொன்னேன். என்னிடம் வருகிறீர்களா? என்று கேட்டதும், முதலில் மகளின் வகுப்பு ஒன்றுக்காக யோசித்து விட்டு பின்பு இந்த வாய்ப்பு நிச்சயமாக எனக்கு கிடைக்காது என்று வருகிறேன் என்று சொல்லி கிளம்பிவிட்டேன்.

எழுத்தாளர்கள் இருவர் பேசிக் கொண்டிருக்க நான்வென்று வாய் பிளந்து கேட்டுக் கொண்டிருந்தேன்…..:) என்னைப் பற்றி சொல்லிக் கொள்கிற அளவில் ஒன்றும் எழுதவில்லையே! அதனால் நான் அறிமுகமானதேராஜி”(ரேவதி வெங்கட்)ன் தோழி என்று தான்…:) எளிமையானவர் என்று சொன்னேன் அல்லவா! சந்தித்த மறுநாளே முகப்புத்தகத்தில் என் தோழமையாகி விட்டார்.

இப்படியொரு வாய்ப்பை ஏற்படுத்தி கொடுத்த ரிஷபன் சாருக்கு என் மனமார்ந்த நன்றிகளை இங்கும் தெரிவித்துக் கொள்கிறேன்.

மீண்டும் சந்திப்போம்,

ஆதி வெங்கட்

திருவரங்கம்.