எல்லா நாளும் எங்கள் வீட்டில் பௌர்ணமி.....

சென்ற மாதம் சக பதிவர் உஷா அன்பரசு அவர்களிடமிருந்து ஒரு மின்னஞ்சல் வந்திருந்தது. அவர் ”தங்க மங்கை” குடும்ப நல மாத இதழுக்காக கருத்துக்களம் ஒன்றினை திரட்டுவதாகவும், “கணவன், மனைவி உறவுகள் மகிழ்ச்சியாக இருக்க புரிதல்கள் எவ்வாறு இருக்க வேண்டும்?” என்ற தலைப்பில் எனது கருத்துகளை அனுப்புமாறும் கேட்டிருந்தார்.

நான் அனுப்பிய கருத்துகள் இந்த மாதம், அதாவது ஃபிப்ரவரி மாத ”தங்கமங்கை” இதழில் வெளிவந்திருக்கிறது. தங்க மங்கை நாளிதழ் நடத்துபவர்களுக்கும், வேலூர் உஷா அன்பரசு அவர்களுக்கும் எனது மனமார்ந்த நன்றி. நான் அனுப்பிய கருத்துகள் கீழே.  தங்கமங்கை ஃபிப்ரவரி மாத இதழ் படிக்க இங்கே க்ளிக்கவும்!

இருவரிடையேயும் எந்த ஒளிவு மறைவும் வைத்திருக்கக் கூடாது. அது பின்னாளில் பெரிய பிரச்சனைகளுக்கு காரணமாக அமைந்து விடும். வாழ்க்கையே நரகமாக போய்விடும். அன்றாடம் நடக்கும் சின்னச் சின்ன நிகழ்வுகளையும் ஒருவருக்கொருவர் பகிர்ந்து கொள்ளத் தொடங்கி விட்டாலே, அதுவே நல்லதோர் உறவு அமைய காரணமாக அமைந்து விடும். இருவருமே கடந்த காலங்களில் ஏற்பட்ட கசப்பு அனுபவங்களை மனதில் சுமந்து கொண்டிராமல் நிகழ்காலத்தையும், எதிர்காலத்தையும் மட்டுமே மனதில் அசை போடுகின்ற மனோபாவம் இருப்பது அவசியம். நம்பிக்கை வைத்திருத்தல் என்பது இருவருக்கும் இருந்து விட்டால், மூன்றாவது ஒரு நபரால் நம்மை என்ன செய்து விடமுடியும். அவ்வப்போது சிறு சிறு ஊடல் நட்பின் மூலமோ, உறவுகள் மூலமோ ஏற்படக்கூடும். அதை கணவன் மனைவி இருவரும் மனம் விட்டு பேசி தீர்த்துக் கொள்வதே சிறந்த வழியாகும்.

 

இருவருமே வளர்ந்த சூழ்நிலைகளும், பாரம்பரியமும் வேறாக இருக்கும். அப்படியிருக்கையில் அவர்களிடத்தில் எந்த வித எதிர்ப்பார்ப்பும் வைத்துக் கொண்டிராமல் அப்படியே ஏற்றுக் கொண்டு புரியத் துவங்குவது தான் சிறந்த வழி. எதிர்பார்ப்பு என்பதை யாரிடத்திலும் எந்த காலத்திலும், எதற்காகவும் வைக்காமல் இருப்பது பெரிய ஏமாற்றங்களை தவிர்க்கும். பணம் வாழ்க்கையின் ஒரு அங்கமே தவிர அதுவே வாழ்க்கையல்ல. நம்மை வாழ்க்கையில் உயர்த்த உதவும் ஒரு கருவியாக பயன்படுத்தலாம். அது கணவன் மனைவி இடையுள்ள அன்பை எந்நாளும் வலுப்படுத்த உதவாது. ஆடம்பரம் அழிவைத் தான் கொடுக்கும். எந்த ஒரு முடிவையும் இருவரும் இணைந்தே எடுத்தல் நலம். யாரிடத்தும் இருவரும் ஒருவரை ஒருவர் எந்த இடத்திலும் விட்டு கொடுத்து பேசக்கூடாது. இது தான் பெரும்பாலான குடும்பங்களில் சண்டை சச்சரவுகளுக்கு காரணமாக அமைந்து விடுகிறது. குடும்பத்துக்கான வேலைகளை கடமையாக செய்யாமல் தன்னுடைய பங்களிப்பாக செய்தால் சந்தோஷம் நிலைத்திருக்கும்.

 

இதையெல்லாம் விட கணவனும், மனைவியும் இந்த சமுதாயத்தில் ஒருவர் மற்றவருக்கு கிடைக்க வேண்டிய மரியாதையை எந்நாளும் பெற்றுத் தர வேண்டியது நமது கடமை. எந்த ஒரு விஷயத்திலும் ஒருவர் வார்த்தையை மீறி அடுத்தவர் செயல்படக்கூடாது. இதையெல்லாம் மனதிற்கொண்டு செயல்பட்டாலே மகிழ்ச்சி ஓங்கும். உறவும் நிலைத்திருக்கும் என்பது என் அபிப்ராயம்.

இதே இதழில் கோவை எழில் அவர்களுடைய கட்டுரையும் இடம் பெற்றிருக்கிறது.

 

என்ன நண்பர்களே, பதிவினை ரசித்தீர்களா?

மீண்டும் வேறொரு பகிர்வில் உங்களைச் சந்திக்கும் வரை...

நட்புடன்

ஆதி வெங்கட்

திருவரங்கத்திலிருந்து...