வீடும் + குறிப்புகளும்!!!!

 

இந்த வீடு காலண்டர் ஷீட்டினால் ஆனது… வருடத் துவக்கத்தில் மாத மற்றும் தினசரி காலண்டர்கள் நிறைய நமக்கு வருமல்லவா! அது போல் ஒரு தினசரி காலண்டரில் செய்யப்பட்டது தான் இது! மூன்று நான்கு கிடைக்கும் பட்சத்தில் ஒன்றை இது போல் நீங்கள் செய்யலாம். நவராத்திரி கொலுவிலும், ஷோகேஸிலும் வைத்து அழகு பார்க்கலாம். முழுத்தாள்களும் இருந்தால் தான் இந்த வீடு அழகாக அமையும். மடித்து மடித்து செய்து கொண்டே வந்தால் வீடு அழகாக அமைந்து விடும்…

ஒரு தாளை இப்படி மடிக்கவும்

அடுத்த தாளை இப்படி மடிக்கவும்

கடைசியில் இப்படி வந்துவிடும்

நான் நிறைமாத கர்ப்பிணியாக இருந்த போது பக்கத்து வீட்டில் இருந்த ஒரு பெண் எனக்கு இதன் செய்முறையை சொல்லிக் கொடுத்தாள்.. அப்போது இரண்டு செய்து வைத்தேன். பல வருடங்கள் கழித்து கிராமத்தில் உள்ள என்னவரின் பெரியம்மா வீட்டிற்கு சென்ற போது இந்த காலண்டர் தாள்கள் முழுதாக இருந்ததை பார்த்தவுடன் செய்யத் துவங்கி விட்டேன்……:)) செய்தால் மட்டும் போதுமா! உங்க எல்லோரிடமும் பகிர்ந்து கொள்ள வேண்டாமா…:))))

குறிப்புகள்:-

ரெடிமேட் சட்டைகள் வாங்கும் போது உள்ளே அட்டைகள் வைத்து வரும் அல்லவா! அதை பத்திரப்படுத்திக் கொள்ளுங்கள். அதை வைத்து எங்கள் மகள் ஓவியங்கள் வரைய பயன்படுத்திக் கொண்டாள். கிரீட்டிங் கார்டும் தயாரிக்க சொல்லிக் கொடுத்தேன். இன்னொரு உபயோகம் இந்த கார்த்திகை மாதம் முழுவதும் மாலையில் வாசலில் விளக்குகள் வைப்போமல்லவா! அதன் கீழே இந்த அட்டையை வட்டமாக வெட்டி வைத்தோம். தரையில் எண்ணெய் கசியாமல் இருக்க உதவியது… நீங்களும் முயற்சி செய்து பாருங்கள்.

தேங்காய்த்துருவல் கடைசி வரை குளிர்சாதனப் பெட்டியில் நன்றாக இருக்க வேண்டுமா?

தேங்காய் வாங்கி உடைத்தவுடன் குளிர்சாதன பெட்டியில் வைத்தாலும் மஞ்சள் படியத் துவங்கி விடும். கவர் சுத்தி வைத்தாலும் அப்படித்தான்.. துருவி வைத்தாலும் ஒரு மாதிரி வாடை வந்து விடுகிறது… சமீபத்தில் தான் ஒருவர் சொன்னதாக என் மாமியார் என்னிடம் சொன்னார்… அதாவது துருவி ஒரு பிளாஸ்டிக் டப்பாவில் போட்டு ப்ரீசரில் வைக்கும்படி…. தற்போது அப்படித் தான் செய்து வருகிறேன். கடைசி வரை நன்றாக இருக்கிறது. ஒன்றே ஒன்று மறக்க கூடாது…. காலையில் எழுந்தவுடன் வெளியே எடுத்து வைத்துவிட வேண்டும். அப்போது தான் வெளியே உள்ள தட்ப வெப்பநிலைக்கு மாறி சமையலில் சேர்க்க ஏதுவாக இருக்கும்….

மீண்டும் சந்திப்போம்,

ஆதி வெங்கட்

திருவரங்கம்.