அல்லம் பச்சடி!

அல்லம் பச்சடியா! இது என்ன புதுசா இருக்கே என்று நினைக்கிறீர்களா? ஒன்றும் புதுசில்லைங்க.. இஞ்சிப் புளி, புளி இஞ்சி என்று சொல்வார்களே…  அது தான். ஆந்திராவில் இது அல்லம் பச்சடி…:) தெலுங்கில் அல்லம் என்றால் இஞ்சி. ஆந்திர செய்முறை வேறு. நாம் இப்போது செய்யப் போவது நம்முடைய வழக்கமான முறை தான். கேரளாவிலும் இது மிகவும் பிரபலம். தயிர் சாதத்துக்கு தொட்டுக் கொண்டு சாப்பிட இது மிகவும் தோதான ஜோடி. வாங்க செய்முறை பார்க்கலாம்…

தேவையானப் பொருட்கள்:-

இஞ்சி – 100 கிராம்

பச்சை மிளகாய் – 7 அல்லது 8

புளி – எலுமிச்சையளவு

உப்பு – தேவைக்கேற்ப

மஞ்சள் பொடி – சிறிதளவு

வெல்லம் – சிறிதளவு

நல்லெண்ணெய் – தேவையான அளவு

கடுகு – ½ தேக்கரண்டி

செய்முறை:-

இஞ்சியை தோல் சீவி நன்கு கழுவி விட்டு பொடியாக நறுக்கிக் கொள்ளவும். பச்சை மிளகாயையும் பொடியாக நறுக்கிக் கொள்ளவும். அடுப்பில் வாணலியை வைத்து, எண்ணெய் சூடானதும், கடுகு தாளித்துக் கொள்ளவும். பின்பு பச்சை மிளகாயை போட்டு இரண்டு நிமிடம் வதக்கிக் கொள்ளவும். அடுத்து இஞ்சியை சேர்த்து வதக்கி கொள்ளவும். பின்பு புளியை கரைத்து விட்டு உப்பு, மஞ்சள்பொடி, வெல்லம் சேர்த்து நன்கு கொதித்து கெட்டியானதும் இறக்க வேண்டியது தான். சுவையான இஞ்சிப் புளி தயார்.

ஆந்திர செய்முறை :-

இஞ்சி, புளி, வரமிளகாய், உப்பு, வெல்லம் அனைத்தையும் மிக்சியில் போட்டு நன்கு விழுதாக அரைத்துக் கொள்ள வேண்டும். வாணலியில் எண்ணெய் விட்டு கடுகு தாளித்து அரைத்த விழுதை சேர்த்து நன்கு சுருள கிளறி இறக்க வேண்டியது தான். இது தான் அல்லம் பச்சடி…:)  இதில் காரம் தூக்கலாக இருக்க வேண்டும். இந்த முறையில் நான் இருமுறை செய்து பார்த்திருக்கிறேன்.

என்ன நட்புகளே! உங்கள் வீட்டிலும் இது போல் இரு முறையிலும் செய்து பார்த்து சுவையுங்கள்.

இஞ்சியை பொடியாக நறுக்கி உப்பு, எலுமிச்சை சாறு விட்டு ஒரு பாட்டிலில் வைத்துக் கொண்டு, அவ்வப்போது வாயில் போட்டுக் கொள்ளலாம். பித்தத்தை குறைக்கும். நன்கு ஜீரணமாகும். பசியைத் தூண்டும்.

மாங்காய் இஞ்சி கிடைக்கும் போது அதையும் இது போல் பொடியாக நறுக்கி உப்பு, எலுமிச்சை சாறு விட்டு கடுகு, பச்சை மிளகாய், பெருங்காயம் தாளித்து வைத்துக் கொண்டால் மோர் சாதத்துக்கு அருமையாக இருக்கும். செய்து பாருங்கள்.

மீண்டும் சந்திப்போம்,

ஆதி வெங்கட்

திருவரங்கம்.